Nasa’n Na?

Nasa’n na, mga parol na kay ganda?

At mga batang paslit na kumakanta,

Kinukumpas punkos na tansan na dala,

Habang hinahampas tambol na lata?

Nasa’n na, o nasaan na?

Kalembang ng maagang misa,

Puto-bumbong sa may kalsada,

At bagong lutong mga bibingka?

Nasa’n na, ingay ng barkada?

O ngiti ni lolo at ni lola,

Ang halakhak ni ate at ni kuya,

At yakap ng aking ama’t ina?

Nasa’n na, o nasa’n ka na?

Paskong kinamulatan at nakilala,

Nasasabik at hinahanap ka,

Ginugunita na lang, ‘pagkat ‘di makita.

(*image of carolers from here, puto bumbong from here, “mano po” from here, Pinoy Christmas from here)